Chanson favorite de François Meurs

Mes djins si d’j’ai l’humeûr chagrine
Si d’j’ai d’èle pwin.ne et des tourmints
C’est qui m’pètite gatte Josèfine
Est crèvéye ayèr au matin
D’j’ai cru r’cèvwèr in coup d’massue
Et d’j’ai brai tout comme in n’èfant
Quand djè l’ai là r’trouvéye stindue
Dins l’cwin d’no r’mîge in m’èrlèvant

Non djè n’l’èrvirai pu
m’pètite gatte adoréye
El bon Djeu l’a voulu
Josèfine èst crèvéye

Ç’asteut vraimint n’boune pètite bièsse
Dj’èrwès co ses îs si lûjants
Qui m’érwétinent plins d’djintiyèsse
Quand djè daleu l’min.ner à tchamps
Drola m’achidant dins l’pature
Djè pèrdeut s’tièsse dèdins mes mwins
Yè léye, pauv’ pètite créyature
Ele m’èrlètcheut di contint’mint.

Dji sogneus si bî m’pètite gatte
Què m’feume da stî djalousse souvint
Ele mè diseu : « mèttèz-le dins l’ouate
Yè signéz-li vo testamint »
Mais tout ça c’èst des ravaudadges
Et si dè m’gatte, dji d’asteût sot
C’est qu’avoût léye jamés d’ramâdges
Jamés d’grognons ni d’coûps d’chabots.

Djusqu’à nos bièsses d’ont stî d’bauchéyes
Nos pourcha n’voût pu rî mindjî
Les pouyes d’ont atrapé l’pèpéye
Da co twès d’crèvéyes sus l’fumî,
Eyè les vatches, qu’èl djâpe m’importe
n’veulent-te pus d’ner n’pinte dè lachat
Crwèyème, d’jè n’d’ai vu d’toutes les sortes
Dèspus qu’Josèfine n’est pus là !

Josèfine asteut si djintîye
Qui djè n’sâreûs nin l’roubliyî
Djè l’considerais d’èle famîye
Tél’mint qui djè l’vwèyeû voltî
Et dins nos cinse, vos pouvéz m’cwère
Pou vos prouver qu’nos stons d’bautchîs
Nos n’avons fait qu’dire des priyères
Pou qu’elle s’èvôye au Paradis.