On pout dire què dj’ai dè l’tchance
Em’vî mononque vént d’moru
Dj’ai yeû toute esse n’héritance
I n’iaveut plein deux poûsses-cu
Vos faura v’nu vîr çà
Tous les bidons, tous les testias !
hioup la-la, hioup la-la,
il a cassè s’pupe
hioup la-la, hioup la-la,
èm mononque Colas
Dj’ai yeu n’tâpe et ène vîye drèsse
Come istuve, in p’tit tuqwè,
In coqmwoir, ène iscumerèsse
In bar à pup, in murwè
Twès tchèyères sins s’ploton,
Eyèt l’portrait d’Napoléon
I s’lumeut d’ène pètite lampe
Avou n’crasse witche di coton
Eyet pou s’chèrvu d’pot d’tchampe
I n’aveût qu’in vî pèlon
Dj’ai co yeu s’bleu saurot,
Deux chemisètes èt ses chabots.
Dj’ai yeu n’vèssie au toubaque
Qu’il aveut r’çu come bounan,
Es bwesse à roûle et s’bèle fraque,
Mins c’n’est pus l’mode des courts pans.
Pou deux francs, c’esse-t-heureux
Dj’l’ai foutu su l’dos d’in bribeu.
Tous les ans, quand c’ît l’ducasse
I fèyeut les dûrs-min.nets,
C’esse-t-insi qu’ dj’ai yeû s’bèsace
Et in bia dolman d’lancièts
In vî tambour sins pia
Ene gawe yè in armonica
C’ît l’braconiè d’après l’diâbe
Dj’ai yeû ses boûses à lapins,
Des lignes di fond, c’est probâbe
Qui m’d’a léchi pus d’deux cints …
Dj’ai co yeû s’n’hèguènwèt
Et quatôse gayoles à cisets
Les biyeteûx, d’lé s’tâbe ployante
Su les djeux d’balles du pays,
Mindjunent des oûs, des amantes
En mîsant dissu s’tapis
Dins m’guèrnyî, tout est là
Dj’ai co s’djeu d’flèche et s’clicotia
Dji va fini m’n’argèdène
Nos d’allons l’tchanter d’asto
C’est m’bèle-mame qui s’ra contène
Si vos criyèz come des sots
S’on rèvèye èl vijint,
N’nos r’tournons nén, c’esse-t-in flamint.