Une chanson de François Loriaux, que l’oncle Pierre Piret interprétait brillamment, et que Philippe Meurs avait intégrée dans son répertoire.
Savez ben qu’yèr èl garçon du fourier
L’frére à Fifine,
L’galant Céline,
Nos a min.nès au salon du Lancier,
Où djé r’trouvé m’n’amoureûs calonier
Djé dansé sins manquer ‘ne quadrîye
Djé valsé qu’dj’in seû co stourdîye.
Vos aurîz dit qu’tout skètès dins l’Faubourg :
C’té djustèmint èl quénzenne au Mambour.
Tra déri déri déra ! M’jouwissance,
Mi, c’est l’danse.
Tra déri déri déra ! Vive èl danse
Au son du boum la la !
Dji sés valser, l’on m’aprind tous les djoûs,
Après m’djournéye
Al Mau lavéye.
Dji poû valser dissus in quaut’ron d’oûs
Dj’n’in cass’ré pont télmint qu’djé l’pas doûx.
Yèn, deûs, twès, dji conès l’mèsure !
M’galant m’dit qui djé n’fiér’ tournure.
Mès qué pléji, qu’i fét guéye au Faubourg
Surtout quand c’est’ èl quènzene au Mambour.
Dj’é dîj-wit ans dispûs l’djoû Saint-Crépin,
In bia visâdje,
In fén corsâdje,
In bia p’tit pîd tchaussi d’in fén scrèpin
Dès-îs bén nwérs, ène pia come in satin.
Chakin m’dit : « T’ès-t-ène éwaréye ! »
On dit ça, paç’qui dji seû guéye.
Qui nè l’srèt nén, quand on-z-èst du Faubourg
Et qui c’èst l’djoû dèl quènzene au Mambour ?
Toudis l’promière au son du viyolon,
Dissus l’danse
Mi, dji m’lance.
Si m’vis-à-vis r’cwet in coup di m’talon
Dj’j’vos l’fous sus s’ponse, aussi long qu’il est long.
Si l’gayârd èm’ lance ène calote,
M’galant l’prind pau fond di s’culote.
I faurèt vîr com on s’cougne au Faubourg
Tous les djoûs qu’c’est’ èl quénzene au Mambour.
On djoke èl danse, i pouvèt yèss’ mègnût
Vla qu’à l’ronde
Chakin tchonte
Alôrs on r’va, mès dins l’brouyârd dèl gnût,
Dins no djârdin, dji tché su in cabu.
Èm’ vî pa, m’vwèyant machuréye
M’a r’tanè, qu’dj’in seû stoumakéye.
Mès mi, dj’mè fous, téns, dj’voûrès pour l’Faubourg
Qu’tous lès wit’ djoûs, c’s’rèt quénzene au Mambour.