1/
In coup qu’dj’ai seu mes notes
Dj’achète in bia piston
Ça n’asteut pus qu’popot’
Popot’ t’avau l’maison
Si pîre què m’mame naujéye
D’intind’ èle min.me tchanson
M’apice pa l’pia d’èle panse
Yè skète èm’ nieù piston.

Sur l’air du tra déri déra, tralala

2/
Djè r’tî dè d’sus m’quinzin.ne
Dj’achète in nieù altô
Falou m’vîr à l’sortiye
Pus fièr qu’in vî bedeau
El swâr dj’atrape ène chike
Dj’aroke à oun’ cayau
Djè m’èstind come ène fike
E skète èm’ nieù altô.

3/
Djè r’tî co d’sus m’quinzin.ne
Dj’achète in nieù tuba
Djè m’dit faura d’l’alin.ne
Pou soufler dins c’ti-là !
Djè souf, djè souf, djè souf
Dj’aleus r’ker ça si long
Què vl’a-t-i nî, mes cousses,
Què djè fé dins mes fonds !

4/
Djè r’mèts l’tuba à place
C’est bî trop fourt pour mi
Yè djè va ké n’vîye flute
Qui pindoût au fourni
N’a nî co d’cîq munutes
Què m’pètit frére Tintin
Brèyoût pou fé tutut’
Tutut’ su m’n’instrumint.

5/
Viyant què dj’n’ai pon d’tchance
Dins tous mes instrumints
Djè m’dis : « gna pon d’avance
Djè n’s’rai nî musiciyen
Dj’asteus trisse, vingt godomes
Quand l’chèf vient m’dire tout bas
Ele grosse caisse est sins-z-homme
C’est ti-min.me qui l’batras

6/
In djoû què d’batoût l’caisse
Résolu comme in bieù
El chef èm’ dit : « grosse bièsse
Bûchiz, n’uchez nî peu ! »
Djè buche, djè buche, djè buche
Comme in-n-extèrminè
Tout d’in coup ça fait « floutche »
El bazar î trawè !